Kyrjun um kufl

Á laugardaginn kemur þann 24. febrúar 2018 verður leshringur í Zen á Íslandi - Nátthaga. Við munum þá lesa saman kafla úr bókinni Living by Vow eftir Shohaku Okumura, í þýðingu Mikhael Zentetsu.

Í þessari ótrúlega góðu bók skoðar Okumura-roshi mjög nákvæmlega ríka hefð Zen kyrjunar og þær sútrur sem við kyrjum. Hann útskýrir sútrurnar mjög nákvæmlega og hvernig kyrjunin styður við hugleiðslu okkar og þau einlægu heit okkar að lifa lífi frelsis og samkenndar. Living by Vow er handbók Zen iðkandans, og Okumura leiðir okkur eins og gamall vinur, hann er skýrmæltur og talar beint út um persónulega meiningu sútranna. Þar að auki er hann mjög gjöfull á eigin dæmisögur um praktíska þýðingu þeirra, sem gefur bókinni persónulegt og fallegt yfirbragð.

Við höfum áður lesið kaflana um Hjartasútruna og Samsemd eins og margs úr þessari bók. Nú er komið að kaflanum sem heitir Kyrjun um kufl: Að rækta akur dyggðarinnar. Þessi kafli er um versið sem við kyrjum áður en við setjum á okkur rakusu og okesa eftir morgunsetu. Þegar við kyrjum þetta vers á morgnana þá förum við fyrst tvisvar með það á japönsku og svo einu sinni á íslensku:

DAI ZAI GEDAP - PUKU
MU SŌ FUKU DEN E
HI BU NYO RAI KYŌ
KŌ DO SHO SHU JŌ

Kufl frelsunar á sér engan endi
Velgjörð hans er án forms og litar
Íklædd honum sem sannleik
Frelsum við allar skynverur

Og í þessum kafla bókarinnar segir Okumura til dæmis:

Líkaminn og hugurinn eru samansöfn af mörgum mismunandi þáttum sem eiga sér stað á þessu andartaki. Þetta breytist allt stöðugt, og því er ekki unnt að klófesta eitt né neitt sem líkamann “minn”, hug “minn”, eign “mína”. Samt sem áður festum við okkur við núverandi og tímabundið form, en þar sem allt er án sjálfs, þá getum við ekki klófest þetta form. Þegar við reynum að stjórna því, þá dregur úr lífskraftinum okkar. Þess í stað opnum við hendurnar. Þetta gerum við með því að iðka zazen.

Við byrjum dagskrá laugardagsins með sitjandi hugleiðslu kl. 08:00, en leshringurinn tekur við að henni lokinni. ​Allir eru velkomnir og við vonumst til að sjá ykkur sem flest.