Leshringur: Hin tíu mikilvægu lífsgildi

Á laugardaginn kemur þann 13. janúar 2018 verður fyrsti leshringur vorannar í Zen á Íslandi - Nátthaga. Í þessum leshring munum við lesa kafla úr bókinni Kjarninn í tilverunni eða The Heart of Being, eftir John Daido Loori, í íslenskri þýðingu Alfreds Chozetsu.

The Heart of Being er mjög umfangsmikil bók um siðferðislegar kenningar Zen búddisma. Bókin er mikið notuð í undirbúningi Zen nemenda fyrir Jukai; athöfnin þegar við göngumst formlega við lífsgildunum sextán. Daido-roshi ræðir í bókinni hvernig lífsgildin geta þjónað okkur sem kompás þegar kemur að erfiðum og jafnvel yfirþyrmandi vandamálum lífsins.

Í leshringnum lesum við úr kaflanum Hin tíu mikilvægu lífsgildi: Hugur visku þar sem Daido-roshi fer yfir hin tíu mikilvægu lífsgildi og skoðar þau frá hinum ýmsu sjónarhornum. Þar segir til dæmis:

Að taka líf lifandi veru er brot á fyrsta mikilvæga lífsgildinu. Samt er deyðing lífs allt í kringum okkur, alla tíð. Við tökum öll þátt í henni. Við deyðum til að viðhalda okkar eigin lífi. Sú mikilvægisskipting lífs sem er almennt viðurkennd meðal manna, þar sem við erum efst og kýr og hvítkál eru fyrir neðan, er bara handahófskennd skipting. Líf er líf. Það er allt heilagt - minnsta skordýr, gulrót, kjúklingur, manneskja. Allur matur sem við neytum er líf. Þannig er þetta á jörðinni. Það er engin vera á yfirborði þessarar plánetu sem neytir matar án þess að það sé á kostnað annars lífs.

Við byrjum dagskrá laugardagsins með sitjandi hugleiðslu kl. 08:00, en leshringurinn tekur við að henni lokinni.

​Allir eru velkomnir og við vonumst til að sjá ykkur sem flest.