Dharma ræða Zenki - Að gera það sem gott er

Næsta laugardag, 13. október frá kl. 09:15 - 10:15, mun Ástvaldur Zenki flytja Dharma ræðu í húsakynnum Nátthaga að Grensásvegi 8, 4. hæð. Yfirskrift ræðunnar er "Að gera það sem gott er."
​
Zenki mun sérstaklega ræða um hin þrjú tæru lífsgildi og hvernig þau tengjast lífi okkar í dag. Hann leggur út frá kennslu Suzuki Roshi og segir að lífsgildin séu í raun hjartað í iðkun okkar. En Suzuki Roshi talaði margoft um lífsgildin í ræðum sínum, til dæmis sagði hann þriðjudagskvöldið 4. ágúst 1970:

Að fylgja lífsgildunum í okkar daglega lífi og svo að iðka Zazen virðast mjög ólíkir hlutir, en eru það í raun ekki. Í Zazen, jafnvel þótt iðkun þín sé ekki fullkomin, ef þú iðkar bara okkar leið, þá er uppljómun þegar til staðar því iðkun okkar er tjáning á búddahug.

Vegna hins aðskiljandi huga þá segir þú að iðkun þín sé ekki góð. En ef við aðskiljum ekki í iðkun okkar, þá er það raunveruleg tjáning á raunverulegu eðli okkar, semsagt búddaeðli okkar.
​
Og í okkar daglega lífi, ef við fylgjum lífsgildunum, jafnvel bara eitt andartak í huga okkar, sem er síbreytilegur, þá er sú breyting í hinum mikla síbreytilega huga raunveruleg, og máni búddahugans lætur þá sjá sig: bodhihugurinn er þá til staðar. Svo í raun þá er enginn munur.

Allir eru hjartanlega velkomnir og aðgangur er ókeypis. ​Athugið að dagskrá laugardagsins hefst með sitjandi hugleiðslu kl. 08:00.