Afmæli Búdda 2018

Næstkomandi laugardag, þann 7. apríl, höldum við upp á afmæli Búdda á Grensásveginum með fjölskyldu og vinum. Við höldum fallega athöfn í Zendóinu okkar kl. 10:30 þar sem við förum upp að altarinu og laugum Búdda vatni.  Athöfnin tekur um 30 mínútur.

Með athöfninni minnumst við fæðingu Búdda og bjóðum börnum okkar, fjölskyldu og vinum að taka þátt. Það er gott að geta leyft fjölskyldu og vinum að skyggnast inn í okkar iðkun og upplifa styrkinn og einlægnina sem einkennir okkar athafnir. Það væri líka sérstaklega gaman að sjá eldri iðkendur sem ekki hafa komið lengi.

​Eftir athöfnina höldum við afmælisveislu að hætti Tenzo.

--- Athugið að það er engin seta um morguninn. ---
​

Óvenjuleg fæðing
[Kafli úr bókinni Sagan af Siddarta prins - Búdda, boðbera friðar og kærleika eftir Jonathan Landaw í þýðingu Sigurðar Skúlasonar. Bókin er myndskreytt af Janet Brooke, en myndin sem fylgir þessum pósti er ein af hennar frábæru myndum.]

Endur fyrir löngu gerðist í litlu konungsríki á Norður-Indlandi atburður sem átti eftir að hafa áhrif í öllum heiminum. Maja drottning, eiginkona hins góða konungs Súddódana, lá sofandi og dreymdi yndislegan draum. Henni fannst að hún sæi skínandi bjart ljós á himninum sem lýsti niður til hennar og í miðju ljóshafinu birtist stórfenglegur fíll. Hann var mjallahvítur með sex stórar skögulgennur. Þessi fíll kom fljúgandi úr ljósinu, færðist nær og nær drottningunni og að lokum rann hann saman við líkama hennar. Maja drottning vaknaði og fann til meiri hamingju en hún hafði nokkru sinni upplifað áður.

Hún flýtti sér til konungsins og saman fóru þau á fund vitringanna við hirðina og spurðu þá hvað þessi furðulegi og dásamlegi draumur gæti táknað. Vitringarnir svöruðu: "Ó, yðar hátignir, þetta er óviðjafnanlegur draumur! Hann táknar það að drottningin muni fæða son og að prinsinn sá muni dag einn verða mikill maður. Þetta einstaka barn sem drottningin mun fæða verður ekki aðeins ykkur til gæfu, heldur gjörvöllum heiminum." Þegar konungur og drottning heyrðu þetta urðu þau yfir sig glöð. Einkum varð konungurinn glaður, því hann þráði að eignast son sem myndi erfa konungsríkið eftir hans dag. Og nú virtist ósk hans ætla að rætast.

Á þeim tíma ríkti sá siður, að þegar kona skyldi fæða barn hélt hún til föðurhúsa sinna. Og þegar stundin nálgaðist yfirgaf Maja drottning höllina ásamt mörgum vina sinna og þjónustufólki og lagði upp í ferð til æskustöðvanna.
Þau höfðu ekki ferðast lengi, þegar drottningin vildi nema staðar og hvíla sig. Hún vissi að barnið var um það bil að fæðast. Þau voru stödd í hinum fagra Lúmbíní-garði og þar leitaði drottningin að hentugum stað, þar sem hún gæti fætt barnið. Sagan segir að meira að segja dýr og jurtir, sem virtust einhvern veginn vita hvílíkt barn var að koma í heiminn, hafi viljað hjálpa til. Þarna var t.d. stórt tré sem beygði eina grein sína niður svo drottningin gæti náð taki á henni með hægri hendi. Þegar hún hafði þannig fengið stuðning ól hún son. Þjónustufólkið tók drenginn í fang sér og var furðu slegið yfir fegurð hans og friðsæld.

Á þessu sama andartaki fór tilfinning friðar og hamingju um gjörvallt landið. Fólk gleymdi vandamálum sínum, lagði niður deilur og fann til mikils kærleika og vináttu hvert til annars. Sumir sáu skyndilega regnboga á himninum og öðrum birtust fleiri óvenjulegar og fagrar sýnir.

Vitrir menn um allt konungsríkið tóku eftir þessum teiknum friðar og gleði og sögðu hver við annan í ákefð: "Einhver mikil gæfa hefur gerst. Sjáið öll þessi dásamlegu teikn! Þetta hlýtur að vera alveg einstakur dagur!"
Maja drottning, sem hafði enga hugmynd um, að sú gleði sem hún fann til vegna fæðingar sonar síns, hafði strax breiðst út um allt konungsríkið, tók barnið í fang sér og sneri aftur til konungshallarinnar. Þetta gerðist í byrjun fjórða mánaðar í Indlandi (maí-júní) og tunglið var að verða fullt.

​Það er þessi fæðing Búdda, sem búddistar halda upp á í byrjun apríl, og við ætlum að hittast og halda uppá núna á laugardaginn kemur.

Hlakka til að sjá ykkur öll!

Í gassho,

​-Alfred Chozetsu