All Categories - Zen á Íslandi

Haustönn 2015

9/8/2015

Haustönn Zen á Íslandi - Nátthaga hefst á ný eftir sumarhlé fimmtudagskvöldið 13. ágúst kl. 19:30 með sitjandi hugleiðslu í aðsetri Nátthaga að Grensásvegi 8, 4.hæð.

Framundan á haustönninni eru margir spennandi viðburðir, m.a. námskeið í sitjandi hugleiðslu sem byggir á hljóðbókinni Breath Sweeps Mind eftir Jakusho Kwong, kennara Nátthaga, í september og október.

Nánari upplýsingar um haustönnina munu birtast hér á síðunni á næstu dögum.

Sumarfrí Nátthaga

15/7/2015

Sumarhlé á dagskrá Zen á Íslandi - Nátthaga hefst frá og með laugardeginum 27. júní. Föstudagurinn 26. júní er því síðasti iðkunardagur fyrir sumarhlé. Almenn dagskrá hefst á ný fimmtudagskvöldið 13. ágúst með sitjandi hugleiðslu kl. 19:30. Öllum iðkendum, meðlimum og velunnurum Zen á Íslandi - Nátthaga er þakkað kærlega fyrir veturinn. Njótum sumarsins!

Sesshin í Skálholti

7/5/2015

Senn líður að árlegri sesshin hugleiðsluhelgi Zen á Íslandi - Nátthaga í Skálholti sem fer fram dagana 13. - 17. maí. Sesshin merkir "að snerta hug og hjarta" og er nokkurra daga samfelld hópiðkun í þögn. Það er einstakt tækifæri til þess að draga sig úr amstri hversdagsins og gefa sig allan að iðkuninni með stuðning félaga sinna.

Miðvikudaginn 13. maí kl. 15:30 komum við saman í húsakynnum okkar að Grensásvegi 8 og förum þaðan saman í Skálholt. Þar komum við okkur fyrir og snæðum síðan léttan kvöldverð áður en iðkunin hefst. Sesshin lýkur síðan um miðjan daginn sunnudaginn 17. maí, eftir sameiginlega máltíð og frágang.

Þátttökugjald fyrir allt sesshin er 35.000kr en 12.000kr fyrir stakan sólarhring. Trúfélagar í Nátthaga fá 10% afslátt af þátttökugjaldi. Til þess að skrá sig á sesshin þarf að senda póst á zen@zen.is

Þátttakendur eru hvattir til þess að skrá sig sem fyrst. Hagnýtar upplýsingar um sesshin verða sendar til þátttakenda þegar nær dregur. Hægt er að lesa meira um sesshin hér

Athugið að almenn dagskrá í Zen á Íslandi fellur niður meðan á sesshin stendur, en dagskráin hefst aftur miðvikudaginn 20. maí kl. 07:20 með sitjandi hugleiðslu.

Langar þig að læra Zen hugleiðslu?

27/4/2015

Mánudaginn 4. maí næstkomandi kl. 19:15 gefst byrjendum og áhugasömum tækifæri til þess að kynnast Zen hugleiðslu. Leiðbeinandi er Ástvaldur Zenki. Einnig verður farið yfir það hvernig formleg iðkun fer fram í setusal í Zen hefðinni. Leiðbeiningin tekur um einn og hálfan tíma og þátttökugjald er 3000kr, en innifalið í gjaldinu er mánaðargjald fyrir marsmánuð. Nánari upplýsingar um leiðbeininguna eru hér.

Hægt er að skrá sig með því að senda póst á zen@zen.is, og þátttakendur eru beðnir um að koma með nákvæma upphæð eða leggja inn á reikning Nátthaga: 111-26-491199, kt. 491199-2539 og senda kvittun á ofangreint netfang.

Leiðbeiningin fer fram í húsakynnum Nátthaga að Grensásvegi 8, 4.hæð (gengið inn að aftan). Allir eru hjartanlega velkomnir.

Aðalfundur Zen á Íslandi, mánudaginn 27. apríl kl. 19:30

20/4/2015

Aðalfundur trúfélagsins Zen á Íslandi - Nátthaga verður haldinn mánudaginn 27. apríl kl. 19:30 í húsakynnum félagsins að Grensásvegi 8, 4.hæð. Dagskrá aðalfundarins er eftirfarandi:

1. Skýrsla stjórnar
2. Skýrsla gjaldkera
3. Lagabreytingar
4. Önnur mál.

Allir félagar í trúfélaginu eru hvattir til þess að koma á aðalfundinn.

Um blessun og uppljómun

15/4/2015

Á laugardaginn kemur, 18. apríl kl. 10:15-11:15, mun Andri Fannar Ottósson kynna fyrir okkur seinni hluta þýðingu sinnar á kafla úr bókinni "as it is" eftir tíbeska hugleiðslumeistarann Tulku Urgyen Rinpoche, en fyrri hlutinn var til umræðu á leshring í janúar síðastliðnum.

Tulku Urgyen Rinpoche var einn merkasti kennarinn í tíbesku búddahefðinni á 20. öld, og fjórir synir hans eru einnig kennarar í dag.

Allir eru velkomnir á leshringinn. Athugið að einnig er hægt að taka þátt í hugleiðslu á undan en hún hefst kl. 08:00.

Hugleiðsla til einskis?

24/3/2015

Laugardaginn 28. mars næstkomandi kl. 09:15 mun Ástvaldur Zenki Traustason halda fyrirlestur um Zen í aðsetri Zen á Íslandi - Nátthaga að Grensásvegi 8, fjórðu hæð. Fyrirlesturinn ber yfirskriftina Hugleiðsla til einskis?

Ástvaldur Zenki er annar tveggja aðstoðarkennara Zen á Íslandi - Nátthaga og starfar sem tónlistarmaður og kennari. Allir eru velkomnir á fyrirlesturinn og aðgangur er ókeypis.

Athugið að einnig er hægt að taka þátt í hugleiðslu fyrir leshringinn sem hefst kl. 08:00.

Hljómur tómsins

17/3/2015

Laugardaginn 21. mars næstkomandi verður síðasti leshringurinn um kaflann "Hjartasútran: Hljómur tómsins" úr bókinni Living by Vow eftir Shohaku Okumura Roshi. Við höfum lesið kaflann saman í vetur og nú er komið að því að fjalla almennt um efnið og eru þátttakendur hvattir til þess að punkta hjá sér sérstaklega þá hluta sem þeir vildu gjarnan ræða frekar. Við munum einnig lesa saman Hjartasútruna sjálfa og velta fyrir okkur merkingu hennar.

Allir eru velkomnir á leshringinn sem hefst kl. 10:15 og stendur í um einn klukkutíma. Athugið að einnig er hægt að koma í hugleiðslu sem hefst kl. 08:00.

Hin Mikla Skæra Mantra: Leshringur laugardaginn 14. mars

7/3/2015

Laugardaginn 14. mars næstkomandi kl. 10:15-11:15 verður leshringur í Zen á Íslandi - Nátthaga. Nú er komið að því að lesa allra síðasta hluta langrar umfjöllunar sem við höfum lesið saman í allan vetur, kaflann "Hjartasútran: Hljómur tómsins" eftir Shohaku Okumura Roshi úr bók hans Living by Vow. Sú bók er mikill fengur fyrir Zen iðkendur, því að í henni er að finna kennslu og útskýringar Okumura Roshi á öllum helstu kyrjunartextum Soto Zen búddista, sem við í Nátthaga kyrjum reglulega, og er kaflinn um Hjartasútruna sá viðamesti, enda er sútran í miklu uppáhaldi meðal allra Mahayana búddista. Síðasti hluti textans er hér á síðunni undir flipanum "Þýðingar" og heitir hann Enginn árangur. Allir eru velkomnir á leshringinn.

Að óttast óttann - Fyrirlestur um Zen

3/3/2015

Laugardaginn 7. mars kl. 09:15 mun Gyða Myoji verða með fyrirlestur um Zen í aðsetri Zen á Íslandi - Nátthaga að Grensásvegi 8, 4.hæð. Fyrirlesturinn ber yfirkskriftina Að óttast óttann. Gyða Myoji er lýðheilsufræðingur að mennt og nemandi Jakusho Kwong Roshi til margra ára.

Aðgangur er ókeypis og allir eru hjartanlega velkomnir á fyrirlesturinn. Einnig er hægt að taka þátt í hugleiðslu þá um morguninn sem hefst kl. 08:00.