Næsta laugardag, 25. janúar mun Ástvaldur Zenki-sensei flytja fyrirlesturinn "Orðin tóm" í húsakynnum Nátthaga að Kletthálsi 1, 2. hæð til hægri. Fyrirlesturinn er öllum opinn og er stundvíslega frá kl. 09.15 - 10:15. En á undan honum er hugleiðsla frá kl. 08.00 og er líka öllum velkomið að taka þátt í henni. Ástvaldur segir: "Zen hugleiðsla, eða Zazen, er iðkun sem byggir ekki á orðum eða hugmyndafræði heldur beinir iðkandinn athygli sinni að því sem er akkúrat núna án þess að vilja breyta neinu. [...] Allt sem til er í heiminum hefur aðeins einn stað til að vera til á og það er núna. Ekkert hefur nokkurntíman verið til fyrir utan núna, það er ekkert áðan og ekkert á eftir."
Eins og áður segir þá eru allir innilega velkomnir á fyrirlesturinn næsta laugardag og aðgangur er ókeypis. En dagskrá laugardagsins hefst með sitjandi hugleiðslu kl. 08:00. Hlakka til að sjá ykkur öll á laugardaginn.
0 Comments
Kæru félagar, Næstkomandi laugardag 18. janúar höldum við í Nátthaga upp á nýja árið og brennum karmað okkar í táknrænni athöfn. En dagskráin er svona: 08:00 Zazen 08:40 Nýársathöfn 09:10 Nýárskaffi Karma er óumflýjanlegt og órjúfanlegur hluti af því að vera hugsandi manneskja. Við erum öll föst í vanabundinni hegðun og hugsunum. Þegar við brennum karmað skrifum við á miða eitthvað sem við erum tilbúin að sleppa, eitthvað í fari okkar eða vanamynstrum sem þjónar okkur ekki lengur. Svo brennum við miðann og tjáum þannig á táknrænan hátt okkar einlægu heit um að líf okkar, hugsun, orð og athafnir, verði til blessunar öllum skynverum og leggjum okkar að marki til friðar og jafnréttis. Að lokinni athöfninni fáum við okkur svo kaffi og eigum saman góða stund. Ykkur er að sjálfsögðu velkomið að bjóða með ykkur vinum og fjölskyldu.
Ég hlakka til að sjá ykkur. Gassho, Zenki Ég óska ykkur gleðilegs nýs árs með þökk fyrir viðburðarríkt ár sem nú er runnið sitt skeið. Dvöl mín í Toshoji og vígsla í Eiheiji og Sojiji setja svip sinn á liðið ár auk þess sem við erum nú komin í nýtt og glæsilegt húsnæði á Kletthálsi 1. Það má með sanni segja að við höfum haft byr undir báða vængi undanfarin ár og engin ástæða til að ætla annað á nýju ári. Kjarni starfsemi okkar er iðkun zazen. Það er djúp ósk mín að okkar sameiginlega iðkun sem sanga (samfélag iðkenda), okkar persónulega iðkun og uppljómun verði öllu lífi til blessunar og framdráttar. Okkar einlægu heit sem eiga sér djúpar rætur í visku og kærleika vekja hjá okkur skilning á því að það skiptir máli hvað við hugsum, segjum og gerum, hvernig við lifum og hverju við veitum athygli. Við skulum, í krafti okkar iðkunar, vera óhrædd við að stíga fram og leggja okkar lóð á vogarskálar jafnréttis, sáttar og friðar á jörðu.
Að koma saman í zazen hugleiðslu og leggja sína eigin þjáningu í faðm söngunnar er í raun magnað og miklu stærra og dýpra en mann skyldi gruna. Sanga er einn af fjársjóðunum þremur: Búdda, Darma og Sanga. Sangan er hornsteinn iðkunar okkar því án hennar er engin iðkun og engin uppljómun. Þegar við iðkum saman gefum við hvort öðru rými og tækifæri til að fara dýpra og sjá skýrar. Að veita öðrum tækifæri til að iðka á þennan hátt er ein besta gjöf sem við getum gefið okkur sjálfum og öðrum. Ég hlakka til að hitta ykkur og iðka með ykkur á nýju ári! Í anda Zen, Ástvaldur Zenki
Rohatsu er japanska og vísar til dags uppljómunar Búdda og hefð er fyrir því að halda daginn hátíðlegan og sitja hugleiðslu inn í nóttina. Við hjá Zen á Íslandi - Nátthaga sitjum því hugleiðslu frá kl. 22:00 föstudagskvöldið 6. desember næstkomandi og til kl. 02:00 aðfararnótt laugardagsins. Dagur uppljómunar Búdda er hátíðisdagur allra búddista. Þá höldum við uppá að Siddhartha Gautama uppljómaðist sem Shakyamuni Búdda. Sagan á bak við þennan dag uppljómunar er í raun saga búddismans. Hún er líka saga um andlegt ferðalag venjulegs manns til uppljómunar, svo og saga kennslu hans og þeirra aðferða sem hann kenndi okkur til að lifa lífinu. Þegar þessi maður, Siddhartha Gautama, fann leiðina til uppljómunar þá leiddist hann af braut þjáningar og endurfæðingar, inn á braut uppljómunar og varð þá þekktur sem hinn uppljómaði, Shakyamuni Búdda, eða bara Búdda.
Iðkendur sem ekki hafa setið Rohatsu velta því gjarnan fyrir sér hvort þetta sé ekki langur tími til að iðka sitjandi hugleiðslu, í 4 klukkustundir. En reyndin er sú, að sögn þeirra sem áður hafa setið Rohatsu, að tíminn breytist þegar maður situr zazen í langan tíma. Klukkustund getur virst sem tuttugu mínútur og tuttugu mínútur geta virst sem klukkustund. Við viljum því hvetja alla iðkendur til að mæta og upplifa Rohatsu með okkur núna í byrjun desember mánaðar. Það er engin seta laugardagsmorguninn á eftir. Hlökkum til að sjá ykkur sem flest á föstudagskvöldið. Kæri viðtakandi,
Markmið Zen á Íslandi - Nátthaga er að starfrækja og viðhalda iðkun Sótó Zen Búddisma á Íslandi. Í Nátthaga er því haldið úti öflugri dagskrá allan ársins hring sem samanstendur af sitjandi hugleiðslu (zazen) sex daga vikunnar ásamt ýmissi annarri fræðslu og öðrum viðburðum (sjá dagskrá Nátthaga 2019-2020). En félagið gæti ekki haldið úti þessari glæsilegu dagskrá ef ekki kæmi til annars vegar vinna meðlima félagsins í sjálfboðinni iðkun og svo hins vegar styrkir til félagsins. Árin 2019 og 2020 marka mikil tímamót í yfir 30 ára sögu Zen iðkunar á Íslandi. Á þessu ári fluttum við í nýtt og stærra húsnæði að Kletthálsi 1 og er nú í gangi vinna við að innrétta það. En breytt húsnæði mun betur þjóna vaxandi starfsemi félagsins og gera okkur kleift að efla þjónustu okkar enn frekar við íslenskt samfélag, til dæmis hvað athafnir og fræðslu varðar. Einnig eru þessar breytingar mikilvægt skref í þeirri framtíðarsýn okkar að byggja upp Zen-miðstöð á Íslandi. Einnig stendur til að taka upp embætti Ábóta á komandi vori eins og hefð er fyrir á Zen iðkunarstöðum um allan heim. Samhliða því mun Zen á Íslandi öðlast sjálfstæði og viðurkenningu Sotoshu, alþjóðlegu Zen-samtakanna í Japan. Samkvæmt lögum um trú- og lífsskoðunarfélög á Íslandi fá þau greidd sóknargjöld frá hinu opinbera fyrir hvern skráðan meðlim. Sóknargjöldin eru mikilvægur þáttur í rekstri trúar- og lífsskoðunarfélaga, sérstaklega þeirra sem minni eru. Því er mikilvægt að hver og einn hugsi sig vel um hvað varðar sóknargjöldin í þeirra nafni. Teljir þú starfsemi Zen á Íslandi þýðingarmikla þá er okkur mikill styrkur í að þú skráir þig í trúfélagið. Ef þú ert þegar skráður þá þökkum við stuðninginn og vonum að þú verðir félagi áfram. Viljir þú gerast félagi er auðvelt að breyta trúfélagsskráningu sinni (sjá leiðbeiningar á heimsíðu okkar). Athugaðu að til þess að sóknargjöld í þínu nafni renni til Zen á Íslandi - Nátthaga árið 2020 þarf að breyta skráningunni fyrir sunnudaginn 1. desember næstkomandi. Að lokum viljum við taka fram að öllum er velkomið að taka þátt í dagskrá Zen á Íslandi - Nátthaga, óháð trúar- og lífsskoðunum. Fyrir hönd Zen á Íslandi – Nátthaga, Alfred Chozetsu Þórðarson Forstöðumaður Zen á Íslandi - Nátthaga Ástvaldur Zenki Traustason Kennari Zen á Íslandi – Nátthaga Næstkomandi laugardag 23. nóvember munum við halda leshring hjá Zen á Íslandi - Nátthaga, að Kletthálsi 1, 2. hæð til hægri. Í þetta sinn lesum við textann "Allt Zazen" eftir Issho Fujita í þýðingu Jónu Shiko. En í textanum segir Issho Fujita meðal annars "Hins vegar, líkt og Sawaki Roshi lét hafa eftir sér, ,,Ef það svo mikið sem örlar á persónulegum áhuga, þá verður zazen aldrei tært og ómengað”. Af þeim sökum, þá gildir einu hversu ákaft við iðkum af persónulegum hvötum, þá er ekki hægt að iðka zazen. Til að zazen sé að sönnu zazen, þá liggur þetta stranga skilyrði fyrir og býður ekki upp á málamiðlun." Við byrjum dagskrá laugardagsins með zazen, eða sitjandi hugleiðslu, kl. 08:00 en leshringurinn er svo frá kl. 10:15 - 11:15. Allir eru velkomnir og við vonumst til að sjá ykkur sem flest. Djúpt Gassho.
Næsta laugardag, 16. nóvember frá kl. 09:15 - 10:15 mun Ástvaldur Zenki-sensei flytja Darmaræðu í húsakynnum Nátthaga að Kletthálsi 1, 2. hæð til hægri. Yfirskrift ræðunnar er "Vakandi athygli, fræ heilunar". Ástvaldur segir: "Enginn vex úr grasi án þess að þróa með sér kerfi til að lifa af, einskonar varnarkerfi sem er í raun eðlileg viðbrögð barns við óeðlilegum aðstæðum. Þegar fram líða stundir höldum við áfram að þróa varnarkerfið okkar, mynstur sem felur í sér mikla þjáningu, okkar persónulegu þjáningu. Fáir, ef einhverjir, sleppa. Öll erum við meira eða minna þrælar þessara vana- og varnarkerfa og bregðumst við, eins og nafnið gefur til kynna, af vana og oftast óafvitandi. Þessi Mynstur viðhaldast afþví að við sjáum ekki, lítum okkur ekki nær eða gefum okkur tíma til að staldra við og horfa af vakandi athygli, einlægni og heiðarleika djúpt inn í tilveruna þar sem fræ heilunar liggur í dvala. Með því að beina okkar náttúrulegu, vakandi athygli að stundinni vökvum við fræ heilunar."
Allir eru innilega velkomnir á ræðuna næsta laugardag og aðgangur er ókeypis. Athugið að dagskrá laugardagsins hefst með sitjandi hugleiðslu kl. 08:00. Níu djúpar beygjur. Laugardaginn 2. nóvember frá kl. 08:00 - 13:00 verður haldinn Dagur vakandi athygli hjá Zen á Íslandi - Nátthaga. Dagskráin hefst kl. 08:00 með tveimur zazen hugleiðslusetum og gönguhugleiðslu inn á milli. Svo tekur við morgunverður og leshringur. Við munum lesa textann "Að snúa útgeislun sinni innávið" úr bók kennara okkar Jakusho Kwong-roshi í þýðingu Óskars Ingólfssonar. En þar segir meðal annars: Uppspretta án uppsprettu. Ástæðan fyrir því að það er kallað uppspretta án uppsprettu er sú að uppsprettan er okkar upprunalegi hugur, sem við erum hluti af. Það er ekki talað um "án uppsprettu" til að gefa því frumlegt nafn. Ef við segjum aðeins "uppspretta" virðist það vera eitthvað ákveðið og í framhaldi af því leitum við þessarar uppsprettu. Hvað er átt við þegar talað er um eitthvað "án uppsprettu?" Hvað er það? Við hvorki skiljum né getum skilgreint það á hlutlægan hátt eins og við erum vön, en í þeim heimi sem er "án uppsprettu" finnum við þann stað sem tilheyrir djúpu samadhi í zazen. Þegar við höfum lesið textann og rætt hann okkar á milli þá ljúkum við Degi vakandi athygli með því að hugleiða aftur tvisvar með gönguhugleiðslu inn á milli. Þegar við iðkum á Degi vakandi athygli leyfum við ljósi hinnar vakandi athygli að skína og iðkum af heilum hug. Vonumst til að sjá ykur sem flest.
Næstkomandi laugardag 26. október munum við halda leshring hjá Zen á Íslandi - Nátthaga, að Kletthálsi 1, 2. hæð til hægri. Í þetta sinn lesum við textann "Í zazen þar sem ekkert er að öðlast" eftir Issho Fujita í þýðingu Brynjars Shoshin. Issho Fujita er japanskur Zen prestur sem tók vígslu í Antai-ji hofinu þar sem Kodo Sawaki og Uchiyama Roshi voru ábótar á sínum tíma, en við höfum lesið mikið af textum þessara miklu kennara í gegnum árin. Fujita flutti til Massachusetts í Bandaríkjunum þar sem hann var ábóti í Pioneer Valley Zendo, sem er systur hof Antai-ji í Bandaríkjunum. Á þessum tíma kenndi Fujita í mörgum háskólum og 2010 var hann gerður að stjórnanda Soto Zen International Center í San Francisco. Fujita er skemmtilegur kennari sem reynir að finna upp á nýjum og skemmtilegum leiðum til að dýpka hina einföldu iðkun zazen og shikantaza. Á myndinni sem fylgir, og tekin var í heimsókn Issho Fujita til Sonoma Zen Center, má m.a. sjá Helgu Kimyo-roshi, Nyoze Kwong, Issho Fujita fyrir miðju, Ástvald Zenki vinstra megin við hann og Jakusho Kwong-roshi kennara okkar hægra megin. En í textanum sem við lesum næsta laugardag fjallar Fujita um mikilvægi þess með hvaða viðhorfi við sitjum á púðanum og meðal annars: Væri ekki alveg í lagi að segja að gæði zazen séu í raun háð þessu viðhorfi sem við höfum jafnvel áður en við byrjum að iðka zazen? Hvað varðar raunverulega zazen iðkun okkar er útkoman nánast ákveðin áður en við 'stígum upp á sviðið.' Þegar við setjumst á púðann, með hvaða viðhorfi mætir þú zazen? Leynast ekki í huganum einhverjar væntingar um að þú munir fá eitthvað í skiptum fyrir iðkun zazen? Hve djúpur er skilningur þinn á að zazen er ekki leið til að ná einhverju? Við byrjum dagskrá laugardagsins með zazen, eða sitjandi hugleiðslu, kl. 08:00 en leshringurinn er svo frá kl. 10:15 - 11:15. Allir eru velkomnir og við vonumst til að sjá ykkur sem flest. Djúpt Gassho.
|
Eldra
April 2024
HöfundurZen á Íslandi Efni |
Zen á Íslandi | Fréttir og tilkynningar |
Vertu vinur okkar á Facebook
|
Félag
Zen á Íslandi-Nátthagi kt. 491199-2539 |
Bankareikningur
kt. 491199-2539 reikn. 111-26-491199 |