All Categories - Zen á Íslandi

Vorsesshin Zen á Íslandi - Vegurinn heim

2/5/2019

Vorsesshin Zen á Íslandi verður haldið í Skálholtsbúðum
dagana 8-12. maí 2019 undir yfirskriftinni „Vegurinn heim.“

Sesshin er nokkurra daga samfelld hópiðkun og getur þýtt "að snerta hug og hjarta" sem vísar til þess að á Sesshin nálgumst við og verðum nánari okkar upprunalega hug. Iðkun á Sesshin fer fram í þögn og með vakandi athygli, þannig gefum við hvert öðru rými og einbeitum okkur að hinni einu stund. Dagskráin hjálpar iðkendum að gefa sig fyllilega að því sem á vegi þeirra er hverju sinni, í hugleiðslusetum, gönguhugleiðslu, kyrjunum, vinnuiðkun og sameiginlegum máltíðum. En þátttakendum gefst líka tími til hvíldar á milli dagskrárliða.

Máltíðir fara fram í formlegri oryoki athöfn þrisvar sinnum á dag en utan þeirra er boðið uppá kaffi og snarl í hvíldarpásum. Eingöngu er boðið uppá grænmetisfæði á hugleiðsludögum og því miður höfum við ekki úrræði til að koma til móts við sérþarfir þátttakenda í mataræði.

Áhugasamir geta lesið umfjöllun um Vorsesshin ársins 2018 hér á vefnum en einnig má finna margar myndir frá Vorsesshin 2018 sem segja sína sögu um hvernig Vorsesshin fer fram hjá Zen á Íslandi - Nátthaga.

Almennt þáttökugjald er 42.000 kr. en 37.800 kr. fyrir iðkendur sem greiða árgjald.

Skráning fer fram með tölvupósti á zen@zen.is.

Augun lárétt Nefið lóðrétt - Darmaræða Kimyo Roshi

25/4/2019

Gleðilegt sumar kæru félagar.

Klukkan 7:20 í fyrramálið hefst iðkunardagskrá okkar að nýju eftir vorfrí og á laugardaginn heldur dagskrá vorsins áfram. Við byrjum á ræðu frá Helgu Kimyo Roshi, en framundan eru svo aðalfundur félagsins og Vorsesshin, hugleiðsludagar í Skálholti.

En næsta laugardag, 27. apríl, frá kl. 09:15 - 10:15 mun Helga Kimyo Roshi sem sagt flytja Darma ræðu í húsa-kynnum Nátthaga að Kletthálsi 1, 2. hæð. Yfirskrift ræðunnar er "Augun lárétt Nefið lóðrétt".

Kimyo Roshi mun fjalla um hvernig við sjáum okkur sjálf í ljósi Zen og hvað er átt við með því að augun mín séu lárétt og nefið mitt lóðrétt.

Allir eru innilega velkomnir og aðgangur er ókeypis. Athugið að dagskrá laugardagsins hefst með sitjandi hugleiðslu kl. 08:00.

Aðalfundur Zen á Íslandi - Nátthaga 4. maí 2019

24/4/2019

Aðalfundur trúfélagsins Zen á Íslandi - Nátthaga verður haldinn laugardaginn 4. maí næstkomandi í húsakynnum félagsins að Kletthálsi 1, 2.hæð.

Dagskrá aðalfundarins er eftirfarandi:

1. Skýrsla stjórnar
2. Skýrsla gjaldkera
3. Lagabreytingar
4. Önnur mál

Lagabreytingin sem lögð verður fyrir aðalfund er þessi:

Breytingatillaga: Breyting á heimilisfangi í 3. grein, en þar segir:

Lögheimili Zen á Íslandi - Nátthaga er í Reykjavík og heimilisfangið að Grensásvegi 8. Félagssvæði trúfélagsins er allt Ísland.

Verði tillagan samþykkt þá mun 3. grein breytast svona:

Lögheimili Zen á Íslandi - Nátthaga er í Reykjavík og heimilisfangið að Kletthálsi 1. Félagssvæði trúfélagsins er allt Ísland.

Laugardagurinn hefst stundvíslega með hugleiðslu kl. 08:00, á eftir ætlar Tenzo að hafa morgunkaffi og síðan hefst aðalfundurinn kl. 10:15.

Leshringur / Njóttu lífsins

11/4/2019

Næstkomandi laugardag 13. apríl 2019 er síðasti iðkunardagur fyrir vorfrí sem er til og með 25. apríl. En á laugardaginn höldum við líka leshring hjá Zen á Íslandi - Nátthaga. Í þetta sinn les Jóna Shiko textann Njóttu lífsins eftir Shunryu Suzuki-roshi í þýðingu Mikhaels Óskarssonar.

Í þessum texta ræðir Suzuki-roshi um að sjá gildi hvers hlutar en vera ekki stanslaust að bera hluti saman og telja einn betri en annan. Í textanum segir hann til dæmis:

Einu sinni sýndi Marian [Derby] mér handfylli af sandi. Þegar hún rétti mér sandinn sagði hún "Þetta eru mjög áhugaverðir steinar." Mér sýndist þetta bara vera sandur, en hún bað mig um að skoða hann í stækkunargleri. Þá voru þessi litlu sandkorn alveg jafn áhugaverð og steinarnir á skrifstofunni minni. Þeir eru stærri, en á bakvið stækkunarglerið var sandurinn mjög svipaður þeim.

Við byrjum dagskrá laugardagsins með sitjandi hugleiðslu kl. 08:00 en leshringurinn er svo frá kl. 10:15 - 11:15. Allir eru velkomnir og við vonumst til að sjá ykkur sem flest.

Leshringur / Orka lífsins

29/3/2019

Næsta laugardag 30. mars 2019 heldur Zen á Íslandi - Nátthagi leshring að Kletthálsi 1. Í þetta sinn munu Gunnlaugur Mushin lesa þýðingu sína Orka lífsins úr bókinni The Light that Shines through Infinity eftir Dainin Katagiri-roshi. Þetta er mjög sterkur texti þar sem segir meðal annars:

Shakyamuni Búdda kenndi að mikilfenglegt kraftaverk væri stöðugt að eiga sér stað í gegnum allar hliðar okkar daglega lífs. Mögnuð lífsorka er sífellt að verki við að skapa og halda uppi lífi okkar. Þessari lífsorku má líkja við eld sem er eilífur og takmarkalaus, og þar sem þessi grundvallar lífsorka er að verki í þínu lífi, er líf þitt mjög verðmætt, hver svo sem þú kannt að vera.

Við byrjum dagskrá laugardagsins með sitjandi hugleiðslu kl. 08:00. Leshringurinn er svo frá kl. 10:15 - 11:15. Allir eru velkomnir og við vonumst til að sjá ykkur sem flest.

Tónleikar / Hver vegur að heiman

28/3/2019

Það eru mikil tímamót framundan hjá félaginu okkar Zen á Íslandi. Í janúar 2018 færði kennari okkari í yfir 30 ár, Zen meistarinn Jakusho Kwong Roshi, Ástvaldi Zenki kennsluna til að miðla henni áfram sem Zen kennari og ábóti Zen á Íslandi. Áður en Zenki verður formlega settur í embætti ábóta mun hann halda til Japans og dvelja í 3 mánuði í klaustrinu Toshoji.

Ástvaldur Zenki heldur um miðjan apríl til Japans þar sem hann mun iðka undir handleiðslu Zen meistarans Seido Suzuki. Þetta er í annað sinn sem Zenki heldur utan því hann dvaldi í Toshoji í 3 mánuði árið 2016.

Til að styðja við för Ástvaldar Zenki og dvöl í Japan verða haldnir tónleikar í Guðríðarkirkju laugardaginn 6. apríl kl. 20.00

Ástvaldur Zenki mun sitja við píanóið og fær til sín frábært tónlistarfólk sem töfrar fram fallega tóna. Þau sem koma fram eru:

Bjarni Arason, Björn Thoroddsen, Ellen Kristjánsdóttir, Guðrún
Gunnarsdóttir, Stefán Hilmarsson og hljómsveitin Mandólín.
Hljómsveitina skipa, ásamt Ástvaldi, Birgir
Bragason bassaleikari og trommuleikari.

Allt þetta frábæra tónlistarfólk gefur sína vinnu og færum við þeim hjartans þakkir.

Miðaverð er kr. 4.500.- og hægt að kaupa miða
með því að millifæra inn á reikning félagsins hér að neðan

Kennitala: 491199-2539
Reikningsnúmer: 111-26-491199

...eða kaupa miða á staðnum!

Jukai leshringur, laugardaginn 16. mars

15/3/2019

Á morgun laugardaginn 16. mars 2019 heldur Zen á Íslandi - Nátthagi fyrsta leshring sinn í nýju húsnæði að Kletthálsi 1. Í þetta sinn munu Jukai nemendur okkar, sem munu taka þátt í Jukai athöfn og gerast þannig búddistar næstu helgi á eftir, lesa þýðingar úr því lestrarefni sem þeir lesa fyrir athöfnina.

Við byrjum dagskrá laugardagsins með sitjandi hugleiðslu kl. 08:00. Leshringurinn er svo frá kl. 10:15 - 11:15. Allir eru velkomnir og við vonumst til að sjá ykkur sem flest.

Hugleiðslunámskeiðið Andinn sópar hugann

27/2/2019

Hugleiðslunámskeiðið Andinn Sópar Hugann er byrjendanámskeið í Zen hugleiðslu. Námskeiðið byggir á hljóðbókinni Breath Sweeps Mind eftir Jakusho Kwong Roshi, en við munum m.a. skoða valda kafla úr hljóðbókinni í íslenskri þýðingu. Nálgun Kwong Roshi er mjög ítarleg og gaumgæfileg og snýr að öllum hliðum Zen iðkunar.

Leiðbeinendur á námskeiðinu eru Ástvaldur Zenki og Gyða Myoji, sem bæði hafa hlotið prestsvígslu hjá Jakusho Kwong-roshi, kennara Zen á Íslandi – Nátthaga, auk þess sem Ástvaldur Zenki gegnir stöðu kennara í Nátthaga.

Námskeiðið hefst fimmtudaginn 14. mars 2019, kl. 17:30 - 19:00. Það stendur í 4 vikur, einu sinni í viku á fimmtudögum frá kl. 17.30 - 19.00 og lýkur því 4. apríl. Kennt verður í nýju aðsetri Zen á Íslandi að Kletthálsi 1.

Kaupa skráningu á námskeiðið

Námskeiðið er öllum opið, óháð trúar- og lífsskoðunum. Þátttökugjald er 15.000 kr. en námskeiðið er ókeypis fyrir þá sem greiða árgjald í Nátthaga. Innifalið í þátttökugjaldi er dagleg iðkun á meðan á námskeiðinu stendur.

Skráning fer fram með því að kaupa námskeiðið í
vefverslun Zen á Íslandi - Nátthaga hér á vef félagsins
eða með því að smella á hnappinn hér til hliðar.

PS: En til skráningar án kreditkorts endilega sendið tölvupóst á zen@zen.is.

Leshringur - Búdda, Darma og Sanga

14/2/2019

Næstkomandi laugardag 16. febrúar 2019 höldum við fyrsta leshring ársins í Zen á Íslandi - Nátthaga. Í samræmi við þema ársins munum við lesa textann "Endanlegt skjól: Að leita athvarfs í Búdda, Dharma og Sangha" úr bókinni Living by Vow eftir Shohaku Okumura í þýðingu Mikhael Zentetsu.

Í kaflanum segir m.a.:

Ég leita athvarfs í Búdda og strengi heit með öllum skynverum;
að öðlast hina Miklu Leið og vekja hinn óviðjafnanlega hug.
Ég leita athvarfs í Dharma og strengi heit með öllum skynverum;
að kafa djúpt ofan í kennslu Búdda, hafsjó viskunnar.
Ég leita athvarfs í Sanga og strengi heit með öllum skynverum;
að færa sátt og samlyndi til allra, til fullnustu, takmarkalaust.

Þegar við gerumst búddistar byrjum við á því að iðrast og leita athvarfs í Fjársjóðunum Þremur eins og þeir eru kallaðir í hinni búddísku hefð: Búdda, Dharma og Sanga. Þetta eru fyrstu þrjár lífsreglurnar af þeim sextán sem við meðtökum í hinni japönsku Sótó hefð sem rekur ættir sínar til Dogens.

Við byrjum dagskrá laugardagsins með sitjandi hugleiðslu kl. 08:00. Leshringurinn er svo frá kl. 10:15 - 11:15. Allir eru velkomnir og við vonumst til að sjá ykkur sem flest.

Kanzeon hjarta samúðar - Darmaræða með Helgu Kimyo

6/2/2019

Næsta laugardag, 9. febrúar frá kl. 09:15 - 10:15 mun Helga Kimyo-roshi flytja Darmaræðu í húsakynnum Nátthaga að Grensásvegi 8, 4. hæð. Yfirskrift ræðunnar er "Kanzeon hjarta samúðar".

Kimyo-roshi mun ræða um Kanzeon erkitýpu samúðar og hjálpar í búddismanum. Hún mun skoða og reyna að varpa ljósi á annars mjög fjölskrúðuga tilveru Kanzeon hjarta samúðar.

Allir eru innilega velkomnir og aðgangur er ókeypis.
Athugið að dagskrá laugardagsins hefst með sitjandi hugleiðslu kl. 08:00.